ललितपुरको सानेमा हाइटमा रहेको होटल एल्लो दरबारले शारीरिक सुगठनका खेलाडी महेश्वर महर्जनलाई ब्रान्ड एम्बेस्डरमा नियुक्त गरेको छ । थाइल्यान्डमा भएको शारीरिक सुगठनको विश्वस्तरको प्रतिस्पर्धामा स्वर्ण पदक विजेता महर्जनलाई एक कार्यक्रमकाबीच होटल एल्लो दरबारकी प्रमुख सुवर्ण श्रेष्ठले ब्रान्ड एम्बेडर घोषणा गरेकी हुन ।
स्पोर्टस हबकारुपमा समेत विस्तार भैरहेको होटल एल्लो दरबारले सो अवसरमा महर्जनलाई सम्मानसमेत गरेको थियो । होटलले आयोजना गरेको कार्यक्रममा राष्ट्रिय खेलकुद परिषद्का उपाध्यक्ष पिताम्बर तिम्सिनाले महर्जनलाई उक्त सम्मान प्रदान गरेका थिए । यसैगरी एल्लो दरबारको हेल्थ क्लबका सदस्यहरूले पनि महर्जनलाई नगर ५० हजार रुपैयाँसहित सम्मान गरेका थिए । इन्टरनेसनल क्लबमा महेश्वर प्रशिक्षकका रूपमा समेत रहेका थिए ।
महेश्वरलाई सम्मान गर्दै उपाध्यक्ष तिम्सिनाले एल्लो दरबारले स्पोर्ट्स भिलेजका रूपमा आफ्नो होटललाई विकास गर्न लागेकामा खुसी व्यक्त गर्दै खेलाडीलाई सहयोग गर्ने रणनीति उपयुक्त भएको बताए । उनले अब खेलकुदमा परिवर्तन हुने र अवसरवादीभन्दा पनि प्रतिभावानले अवसर पाउने बताए ।
होटलकी प्रमुख सुवर्ण श्रेष्ठले होटल एल्लो दरबारले स्पोर्टको हबका रूपमा विकास गर्ने बताइन् । हाल सो होटलमा पौडी, ब्याडमिन्टन,लङटेनिसलगायतका स्पोर्टस संरचना रहेका छन् । कार्यक्रममा महेश्वर महर्जनले जीवनमा फिटनेसको ठूलो महत्व रहेको र होटलले यसलाई फोकस गरेकोमा खुसी व्यक्त गरे ।
